Framkvæmdir í Fjarðarstræti — fyrirstöðugarður og malbikun
Hér eru birtar fréttir af útboðum og framkvæmdum sem í gangi eru hjá Ísafjarðarbæ.
Hægt er að skoða staðsetningu framkvæmda inni á Kortasjá Ísafjarðarbæjar með því að haka í „Framkvæmdir“.
Bæjarráð hefur samþykkt tilboð Tígurs ehf. í gerð 80 metra fyrirstöðugarðs við Norðurtanga á Ísafirði. Verkið felst í flutningi grjóts úr námu í Dagverðardal að garði og röðun í garð. Einnig skal taka upp og endurnýta grjót úr núverandi grjótvörn.
Í útboði er kveðið á um að verktaki skuli gæta þess að ekki sé meira rask utan vinnusvæða en þörf krefur. Þó má gera ráð fyrir að vinnu við verkið fylgi aukin umferð, hávaði og tímabundnar hindranir á aðgengi að svæðinu, sem mun að einhverju leyti hafa áhrif á íbúa í grennd við framkvæmdirnar. Verkið hefst á næstu vikum.
Af þessu tilefni eru eigendur númerslausra bifreiða sem eru á bílaplani við Norðurtanga beðnir um að fjarlægja þá.
Fjörið í Fjarðarstræti heldur svo áfram síðar í sumar þegar neðsti hluti götunnar verður malbikaður, með tilheyrandi raski á umferð. Nánari tímasetning þeirra framkvæmda verður auglýst síðar.