Íþróttir og aðstaða

Íþróttir og aðstaða í Ísafjarðarbæ

Fimm íþróttahús eru í sveitarfélaginu. Tvö eru á Ísafirði, lítill salur í sama húsi og Sundhöll Ísafjarðar við Austurveg og stórt íþróttahús á Torfnesi. Á Suðureyri og Flateyri eru íþróttahús við hlið grunnskólanna, en á Þingeyri er íþróttasalurinn í sama húsi og sundlaugin. Á þessum þremur stöðum (Suðureyri, Flateyri og Þingeyri) rekur Ísafjarðarbær líkamsræktarsali, en á Ísafirði er slík aðstaða í einkarekstri.

Sparkvellir eru alls sjö í sveitarfélaginu og er þeim dreift víða; tveir eru á Ísafirði, tveir á Suðureyri, einn í Hnífsdal, einn á Flateyri og einn á Þingeyri. Þar að auki eru tveir stórir fótboltavellir á Torfnesi á Ísafirði, annar með grasþekju og hinn með gervigrasi.

Svigskíðasvæði er í Tungudal á Ísafirði og gönguskíðasvæði á Seljalandsdal, næsta dal fyrir ofan.

Mjög góð aðstaða er til hlaupa og hjólreiða í öllu sveitarfélaginu og má nefna sem dæmi að göngu- og hjólaleið er alla leið frá Bolungarvík og inn í Holtahverfi á Ísafirði, alls um 19 kílómetra leið í rótum brattra fjalla.

Ísafjarðarbær hvetur íbúa til íþróttaiðkunar, m.a. með lágum verðum á árskortum. Hægt er að fá aukaafslátt með því að kaupa saman árskort í sund og á skíðasvæði og viðbótarafslátt ofaná ef hjón eða sambýlisfólk kaupir kortin saman. Upplýsingar um verð má fá í gjaldskrá skóla- og tómstundasviðs.

Var efnið á síðunni hjálplegt?