Gert ráð fyrir 90 milljóna króna rekstrarafgangi

Fjárhagsáætlun Ísafjarðarbæjar fyrir árið 2019 var samþykkt í bæjarstjórn fimmtudaginn 6. desember.

Rekstrarafgangur samstæðu Ísafjarðarbæjar verður 90 milljónir árið 2019 samkvæmt áætluninni. Skuldaviðmið lækkar og verður 99,36% í árslok.

„Við erum þess fullviss að hér sé verið að leggja fram ábyrga en jafnframt metnaðarfulla fjárhagsáætlun. Við reynum eftir fremsta megni að taka mið af tvísýnum efnahagshorfum en á sama tíma er verið að ráðast í stórar framkvæmdir, sinna mikilvægu viðhaldi og bregðast við áskorunum sem fylgja fjölgun íbúa og brýnni þörf á úrræðum fyrir barnafjölskyldur“, segir Guðmundur Gunnarsson, bæjarstjóri Ísafjarðarbæjar.

Fjárhagsáætlunin endurspeglar þannig áherslu á menntamál, velferðarmál og íþrótta- og æskulýðsmál í Ísafjarðarbæ.

Gert er ráð fyrir verulegri aukningu til málefna fatlaðra vegna breytinga á skilgreiningu á grunnþjónustu á grundvelli nýrra laga.

Alls verður fjárfest fyrir 908 milljónir í Ísafjarðarbæ á næsta ári. Áætlaður beinn kostnaður sveitarfélagsins er 574 milljónir. Meðal stærri verkefna sem ráðist verður í er viðbygging við leikskólann Eyrarskjól á Ísafirði en einnig er áætlað að hefja framkvæmdir við yfirbyggðan gervigrasvöll á Torfnesi. Áfram verður haldið með byggingu á fjölbýlishúsi við Sindragötu.

Ráðist verður í endurbætur og viðhald fyrir ríflega 300 milljónir á árinu en stærstu viðhaldsverkefni sveitarfélagsins verða á Suðureyri, Flateyri og Þingeyri.

Íbúar Ísafjarðarbæjar verða samkvæmt áætlun 3.864 talsins í árslok 2019 en gert er ráð fyrir að íbúum fjölgi um rúmt 1% frá áætluðum fjölda íbúa í lok árs 2018.

Fjárhagsáætlunina má nálgast á vef Ísafjarðarbæjar, https://www.isafjordur.is/static/files/Fjarhagsaaetlanir/fjarhagsaaetlun-2019.pdf