Bæjarráð

Lagt fram erindi Hafdísar Gunnarsdóttur, sviðsstjóra skóla- og tómstundasviðs, og Baldurs Inga Jónassonar, mannauðsstjóra, dags. 8. maí 2025 þar sem greint er frá stöðunni í stjórnendateymi Grunnskólans á Ísafirði. Lagt er til að bætt verði við 50% stöðu deildarstjóra við skólann vegna fjölgunar nemenda og aukinna sérþarfa barna.

Lagður fram til samþykktar viðauki 11 við fjárhagsáætlun Ísafjarðarbæjar 2025, vegna aukins kostnaðar í rekstri Grunnskólans á Ísafirði. Kostnaður er alls kr. 21.316.305 en honum er mætt með tilfærslu á öðrum deildum A hluta.

Nauðsynlegt er að uppfæra tölvubúnað og öryggisbúnað fyrir hærri fjárhæð en áætlað var, eða kr. 7,7 m.kr. Aukið svigrúm er nauðsynlegt í kaffi- og matarkostnaði, og kostnaður vegna skólaaksturs er hærri en áætlað var. Þá var samið við ræstifyrirtæki um þrif vegna breyttra forsendna í starfsmannahaldi og kostnaður ársins áætlaður um 8 m.kr. fyrir árið. Samanlagt aukinn kostnaður við GÍ nemur 21,3 m.kr. og er því mætt með hagræðingu á öðrum deildum A hluta.

Áhrif viðaukans á rekstrarniðurstöðu samstæðu Ísafjarðarbæjar er því kr. 0,-
Áhrif viðaukans á sveitasjóð A hluta er kr. 0,- eða óbreytt afkoma kr. 223.000.000.
Áhrif viðaukans á samantekin A og B hluta er kr. 0,- eða óbreytt afkoma kr. 995.000.000.

Lögð fram til kynningar uppfærð gögn vegna fjárhagslegra markmiða sveitarfélagsins miðað við Ársreikning Ísafjarðarbæjar 2024.

Lagt fram til kynningar minnisblað Eddu Maríu Hagalín, fjármálastjóra, dags. 8. maí 2025, um niðurstöðu fyrsta ársfjórðungs 2025 ásamt stöðu framkvæmda og viðhalds í lok fyrsta ársfjórðungs.
Uppgjörið sýnir jákvæða rekstrarniðurstöðu A og B hluta upp á 1.047 m.kr. fyrir janúar til mars 2025. Fjárhagsáætlun gerði ráð fyrir jákvæðri rekstrarniðurstöðu upp á 1.015 m.kr. fyrir sama tímabil og er rekstrarafgangur 32 m.kr. hærri en áætlað var á fyrsta ársfjórðungi.

Mál sett á dagskrá að beiðni formanns bæjarráðs varðandi mögulegar sameiningar sveitarfélaga á Vestfjörðum.

Strandabyggð hefur óskað eftir sameiningarviðræðum við þrjú önnur sveitarfélög á Vestfjörðum; Kaldrananeshrepp, Súðavíkurhrepp og Árneshrepp, sjá fundargerð sveitarstjórnar Strandabyggðar nr. 1375, frá 8. apríl 2025.

Í stefnuyfirlýsingu Í-listans fyrir kjörtímabilið segir: „Ísafjarðarbær er opinn fyrir öllu samstarfi sveitarfélaga á svæðinu og hugmyndum um sameiningu þeirra.“ Fyrr á kjörtímabilinu lýsti Árneshreppur yfir vilja til sameiningar sem bæjarráð tók vel í, en ekkert varð meira úr málinu.

Formaður hefur á síðustu vikum átt samtöl við forsvarsmenn annarra sveitarfélaga á Vestfjörðum. Almennt sjá þau fyrir sér að frekari sameiningar séu skynsamlegar og óumflýjanlegar á næstu 5-15 árum, en misjafnt er hversu mikill áhugi er á sameiningum að sinni.

Formaður leggur til að bæjarráð lýsi yfir skýrum vilja til sameininga sveitarfélaga á Vestfjörðum og að bæjarstjóra verði falið að vera fulltrúi sveitarfélagsins í óformlegum viðræðum sem kunna að skapast í tengslum við það. Það sé skýrt af hálfu bæjarins að sameiningarvilji eigi ekki að koma í veg fyrir smærri sameiningar annarra sveitarfélaga ef þær eru taldar heppilegri til skemmri tíma.

Lagt fram erindi Steinunnar Ásu Sigurðardóttur, f.h. íbúa á Flateyri, dags. 1. maí 2025, þar sem fram kemur að hópur íbúa hefur hug á að stofna til hollvinasamtaka um húsið og ósa eftir að Ísafjarðarbær gefi hluta eignarinnar til þeirra. Þar með verði ákvörðun um fyrirhugaða sölu hússins dregin til baka. Forsenda stofnunar hollvinasamtaka sé að Ísafjarðarbær sé tilbúinn til að gera langtímasamning og standa straum af lágmarksrekstrarkostnaði og þátttöku í viðhaldi, í samræmi við önnur félagsheimili í sveitarfélaginu.
Jafnframt lagt fram minnisblað Bryndísar Óskar Jónsdóttur, sviðsstjóra stjórnsýslu- og fjármálasviðs, dags. 9. maí 2025, um feril málsins og töluleg gögn félagsheimilanna fjögurra til samanburðar.

Á 1324. fundi bæjarráðs, þann 5. maí 2025, var lagt fram erindi frá nefnda- og greiningarsviði Alþingis dags. 29. apríl 2025, Þar sem umhverfis- og samgöngunefnd sendir til umsagnar 270. mál - Jöfnunarsjóður sveitarfélaga. Umsagnarfrestur er til og með 13.maí 2025 á umsagnagátt Alþingis.

Bæjarráð frestaði málinu til næsta fundar, og er það nú lagt fyrir á nýjan leik, ásamt tillögu bæjarstjóra að umsögn frumvarpsins.

Lagt fram erindi frá atvinnuvegaráðuneyti, dags. 6. maí 2025, þar sem kynnt er til samráðs mál nr. 83/2025, Skýrsla starfshóps um lagaumgjörð hvalveiða. Umsagnarfrestur er til og með 20. maí 2025.

Lagt fram til kynningar erindi frá Önnu Sigríði Einarsdóttur f.h. umhverfis-, orku og loftslagsráðuneytinu þar sem kynnt er Evrópska Samgönguviku sem haldin er 16.-22. september ár hvert og hefur það að markmiði að kynna fyrir íbúum í þéttbýli fjölbreytta samgöngumáta.

Lögð fram til kynningar fundargerð 978. fundar stjórnar Sambands íslenskra sveitarfélaga dags. 30. apríl 2025.

Lögð fram til kynningar fundargerð skóla-, íþrótta- og tómstundanefndar, en fundur var haldinn 7. maí 2025.

Fundargerðin er í 10 liðum.