Samningur um hönnun nýrrar slökkvistöðvar undirritaður

Sigríður Júlía Brynleifsdóttir, bæjarstjóri Ísafjarðarbæjar, undirritaði þriðjudaginn 2. september samning milli Ísafjarðarbæjar og hönnunar- og ráðgjafastofunar Glóru um hönnun nýrrar slökkvistöðvar á Ísafirði.

Verkefnið felur í sér hönnun og útfærslu aðaluppdrátta nýrrar slökkvistöðvar, í samræmi við byggingarreglugerð og gildandi deiliskipulag. 

Ný slökkvistöð verður staðsett á Suðurtanga á Ísafirði og verður grunnflötur hennar að minnsta kosti 750 m². Stöðin mun rúma slökkvibíla, búningsaðstöðu, stjórnrými, geymslur og skrifstofur. 

Samkvæmt samningnum skal grunntillaga að hönnun hússins vera tilbúin 26. september næstkomandi. Lokaskil á hönnun er 7. nóvember 2025.