Ísafjörður: Hreystigarður settur upp fyrir neðan Hlíf

Hreystigarður hefur verið útbúinn fyrir neðan Hlíf, á sunnanverðri lóð sjúkrahússins á Ísafirði. Í garðinum eru átta mismunandi útihreystitæki sem miða að því að þjálfa styrk, þol, jafnvægi og liðleika.

Hreystitækin eru að sjálfsögðu öllum opin, líkt og hreystitækin við Tjörnina á Suðureyri og íþróttamiðstöðina á Þingeyri. Vonast er til að íbúar og gestir verði duglegir við að nýta tækin sér til heilsubótar og skemmtunar. Frágangi á svæðinu í kringum tækin er þó ekki lokið, enn á eftir að setja fallvarnarmottur undir tækin, og því rétt að sýna nokkra aðgát við notkun þeirra.