Dagbók bæjarstjóra 2025: Vika 46
Dagbók bæjarstjóra dagana 17. – 23. nóvember 2025, í 46. viku í starfi.
Þessi vika var þétt. Mikið að gera. Ég fékk einhvern flensuskít en náði að keyra mig í gegnum dagana en það hefndi sín í lok dags og lá ég eins og rotuð þegar heim kom. Núna á sunnudegi er ég sama sem raddlaus en þetta kemur allt.
Stærsta mál vikunnar var að bæjarstjórn samþykkti, eftir aðra umræðu, framlagða fjárhagsáætlun Ísafjarðarbæjar 2026. HÚRRA!
Fjárhagsáætlunin lítur vel út, samanlagðar tekjur A- og B-hluta verða 9,4 milljarðar króna. Útsvarsprósentan er óbreytt, 14,97% enda lögð áhersla á að halda áfram ábyrgu rekstrarformi. Fasteignaskattur lækkar jafnframt niður í 0,48 prósent, sem léttir byrðar á íbúa Ísafjarðarbæjar.
Rekstarniðurstaðan verður jákvæð um 274 milljónir króna í A-hluta og í samstæðunni allri (A+B) er rekstrarniðurstaðan sömuleiðis jákvæð um 583 milljónir króna.
Áfram verður haldið að greiða niður skuldir og standa þannig vörð um sterka fjárhagsstöðu sveitarfélagsins. Fjármálamarkmið eru flest á áætlun eða nást að fullu, sem endurspeglar góða stjórn og trausta stefnumótun.
Framkvæmdir og fjárfestingar nema alls 1,3 milljörðum króna á komandi ári. Þá verður sérstök áhersla lögð á viðhaldsverkefni til að halda áfram að byggja upp og viðhalda innviðum sveitarfélagsins. Frístundastyrkur verður hækkaður, auk þess sem þjónusta á bæði velferðarsviði og skóla- og tómstundasviði verður efld til að mæta þörfum íbúa.
Fráveitumálin verða tekin föstum tökum og unnið markvisst að úrbótum á því sviði. Auk þess verður standsett moltugerðarstöð. Að lokum má reikna með að malbikunarlykt muni svífa um stræti og torg á næsta ári, enda verður unnið ötullega að endurbótum og lagningu gatna.
Það var mikil eining í röðum bæjarfulltrúa við afgreiðsluna og gott að finna að við höfum öll metnað og ábyrga framtíðarsýn þar sem þjónusta, uppbygging og traust fjármál haldast í hendur.
Fjárhagsáætlun 2026: Samantekt bæjarstjóra
Greinargerð fjárhagsáætlunar 2026
Slökkvistöðvarnefnd fundaði í lok vikunnar og fjallaði um framkvæmdahraða verkefnisins. Sendum boltann til bæjarráðs sem tekur ákvörðun um þetta þar sem bæjarráð ber ábyrgð á og tekur ákvarðanir sem snúa að fjármálum sveitarfélagsins.
Svæðisskipulagið var afgreitt úr nefnd í vikunni og nú hafa öll sveitarfélög á Vestfjörðum fengið beiðni um samþykki bæjar/sveitarstjórnar á auglýsingu tillögu að Svæðisskipulagi Vestfjarða 2025-2050. Það er jákvætt að þetta verkefni hefur staðist tímaáætlun sem lagt var upp með fyrir tveimur árum síðan. Allar líkur á að Svæðisskipulag Vestfjarða verði staðfest næsta vor.
Almannavarnanefnd fundaði á föstudag, það eru alltaf tveir fundir á ári hjá þeirri nefnd, sem er mjög fjölmenn.
Ég átti mjög góðan fund með Pálma svæðisstjóra á Vestursvæði og Kristni deildarstjóra þjónustudeildar Vegagerðarinnar. Fundarefnið var öryggismál á Skutulsfjarðarbraut og umbætur á öryggismálum í Vestfjarðagöngum.
Ég fór í heimsókn í Tónlistarskóla Ísafjarðar í vikunni, Doddi bæjarfulltrúi kom með mér. Bjarney Ingibjörg skólastjóri tók á móti okkur, fór yfir starfsemi skólans og gekk með okkur um húsakynnin. Þrír píanónemar spiluðu eitt jólalag, sexhent, inni í Hömrum sem er tónleikasalur skólans. Tónlistarskóli Ísafjarðar var stofnaður árið 1948 af Tónlistarfélagi Ísafjarðar og hefur hann verið rekinn sem sjálfseignarstofnun. Aðkoma bæjarins að rekstrinum er sú að bærinn greiðir laun kennara og skólastjórnenda, samtals 13,5 stöðugildi. Góð og gagnleg heimsókn í Tónlistarskólann, takk!
Upplýsingar um fjölda nemenda í Tónlistarskólanum.
Ég, Doddi bæjarfulltrúi og Bjarney Ingibjörg skólastjóri Tónlistarskólans.
Þau spiluðu sexhent í Tónlistaskólanum.
Í lok vinnudags á föstudag skellti ég mér á sýningu í Lýðskólanum en nemendur voru að sýna afrakstur tveggja vikna í grímusmiðju. Grímusmiðjan er á vegum Kómedíuleikhússins og grímukennarar eru þau Elfar Logi og Marsibil. Gaman að sjá afraksturinn og fékk ég að sprella smá með þeim af þessu tilefni.
Alþakin vaselíni í andliti, búið að plasta hausinn.
Helgin einkenndist af tendrun jólaljósa á jólatrjám á Þingeyri og Flateyri, kolaportsmarkaði í Hnífsdal, jólahlaðborði á Logni, jólamarkaði á Flateyri, sem sagt allskonar jólatengdu.
Jólatréð á Þingeyri kemur úr garði á Engjaveginum á Ísafirði, stórt og fallegt tré.
Kirkjukórinn í Dýrafirði söng nokkur jólalög við tendringuna á Þingeyri.
Leikskólabörn á Þingeyri tóku lagið á tendruninni þar.
Á Flateyri sungu skólabörn.
Jólatréð á Flateyri var tekið úr skógarreitnum fyrir ofan Grænagarð í Skutulsfirði. Glæsilegt tré.
Á jólamarkaðnum í Samkomuhúsinu á Flateyri.
Árlega halda kvenfélagskonur í Hnífsdal kolaportmarkað og kökubasar. Þetta er alltaf mjög vinsælt og vel sótt.
Við skelltum okkur á jólahlaðborð með Erlu vinkonu.
Skúli mennski og Sara spiluðu jólalög á hlaðborðinu.
Þá voru magnaðir minningartónleikar um Halla Engilberts á laugardagskvöld. Þar komu fram fjölmargir listamenn sem unnu með Halla í gegnum tíðina. Fjölskylda Halla kom á svið í lokin og tók nokkur lög við frábærar undirtektir áheyrenda. Gæsahúðarmómentin voru ófá á þessum tónleikum.
Á minningartónleikum um Halla Engilberts, í Edinborgarhúsi.