Stjórn Þróunar- og starfsmenntunarsjóðs Ísafjarðarbæjar - 19. fundur - 14. janúar 2008
Til fundar eru mætt: Margrét Geirsdóttir, forstöðumaður Skóla- og fjölskylduskrifstofu, Guðmundur M. Kristjánsson, hafnarstjóri, Halldór Halldórsson, bæjarstjóri, Jóhann Birkir Helgason, bæjartæknifræðingur, Þorleifur Pálsson, bæjarritari og Þórir Sveinsson, fjármálastjóri.
Þetta var gert:
1. Endurskoðun á fyrirkomulagi um styrkveitingar úr Þróunar- og starfsmenntunarsjóði Ísafjarðarbæjar.
Frá því á haustmánuðum 2007 hefur staðið yfir endurskoðun á fyrirkomulagi á styrkveitingum úr Þróunar- og starfsmenntunarsjóði Ísafjarðarbæjar, til þeirra starfs- manna Ísafjarðarbæjar, er stunda fjarnám eða staðbundið nám. Meðal annars hefur verið leitað upplýsinga frá öðrum sveitarfélögum, um hvernig þessu er háttað þar.
Í ljós hefur komið að fleiri en færri sveitarfélög á suðvesturlandi, veita ekki beina styrki, en starfsmenn halda dagvinnulaunum í fjarveru vegna náms. Á landsbyggðinni eru beinar styrkveitingar algengari. Styrkfjárhæð að upphæð kr.120.000.- á ári samsvarar að öllu jöfnu launum í leyfi vegna fjarnáms.
Sé stuðningur veittur með beinum styrk dregst staðgreiðsla ekki frá þeirri fjárhæð, þar sem styrkurinn er til greiðslu á útlögðum kostnaði svo sem skólagjöldum, ferðakostnaði og uppihaldi. Sé styrkur hins vegar í formi launa í fjarveru reiknast þar staðgreiðsla ein og venjulega.
Stjórn Þróunar- og starfsmenntunarsjóðs er frekar á því að veittir verði beinir fjárhagslegir styrkir, þar sem með þeirri aðferð er gætt meira jafnræðis á milli starfsmanna.
Stjórnin samþykkir að skoða málið aðeins frekar og ræða við fulltrúa þeirra starfsmanna, sem eru í fjarnámi eða staðbundnu námi og nýtt hafa sér styrkveitingar frá sjóðnum.
Fleira ekki gert og fundi slitið kl. 09:00.
Þorleifur Pálsson, bæjarritari.
Margrét Geirsdóttir, forstöðumaður.
Þórir Sveinsson, fjármálastjóri.
Guðmundur M. Kristjánsson, hafnarstjóri.
Jóhann Birkir Helgason, bæjartæknifræðingur.
Halldór Halldórsson, bæjarstjóri.