Atvinnu- og menningarmálanefnd - 87. fundur - 9. september 2008

Mætt voru: Kristján G. Jóhannsson, formaður, Áslaug J. Jensdóttir, varaformaður, Sigurður Hreinsson, Kári Þór Jóhannsson , Guðmundur Þór Kristjánsson.


Neil Shiran Þórisson frá Atvinnuþróunarfélagi Vestfjarða ritaði fundargerð.



Dagskrá fundarins:



1. Staðan hjá Alsýn. 2008-05-0023


Umræðum var frestað.



2. Greining iðnaðarkosta. 2008-06-0031


Framkvæmdarstjóri Vaxtarsamnings Vestfjarða, Neil Shiran Þórisson fór yfir þær hugmyndir sem hafa komið fram í greiningarvinnu unninni á vegum samningsins.  Þeirri frumgreiningu lauk í lok ágústmánaðar og verið er að undirbúa frekari markaðsgreiningu og aðrar rannsóknir til að hægt sé að vinna viðskiptaáætlanir og finna fjárfesta í verkefnin.


 


3. Raforkumál. 2008-09-0039


Atvinnumálanefnd Ísafjarðarbæjar telur mjög mikilvægt að afhendingaröryggi á raforku á Vestfjörðum verði tryggt með sambærilegum hætti og er í öðrum landshlutum.  Þetta er forsenda þess að hér þrífist stóriðnaður, sem krefst mikillar orku, og getur veitt mikla atvinnu hér á svæðinu.  Nauðsynlegt er í því sambandi að kanna alla virkjanakosti á Vestfjörðum og eflingu flutningskerfis.


Nefndin fagnar því að iðnaðarráðherra skuli hafa gert það að algeru forgangsverkefni í orkumálum í iðnaðarráðuneytinu að lyfta raforkumálum Vestfirðinga í sama gæðaflokk og er annars staðar á landinu. 


Greinargerð:


Atvinnumálanefnd hefur að undanförnu kynnt sér stöðu orkumála og fengið á sinn fund sérfræðinga á því sviði.  Ljóst er að miðað við ákveðnar forsendur getur Orkubú Vestfjarða afhent orku innan tveggja ára upp á 10-20 MW á ákveðnum stöðum á norðanverðum Vestfjörðum.   Með hliðsjón af þessu hefur atvinnumálanefnd í samstarfi við Atvinnuþróunarfélag Vestfjarða og Vaxtarsamning Vestfjarða hafið vinnu við greiningu iðnaðartækifæra með tilliti til afhendingaraðstæðna á raforku.  Ljóst er hins vegar að afhendingaröryggi er lakara á Vestfjörðum, en annars staðar á landinu og því nauðsynlegt að það verði bætt. 



4. Hvatningarverðlaun Virðisauki.


Umræður um hvatningarverðlaun.



5. Önnur mál.


Kári Þór Jóhannsson og Guðmundur Þór Kristjánsson vildu láta bóka sérstaklega í sínu nafni:  Við fögnum áskorun Fjórðungssambands Vestfirðinga til sjávarútvegsráðherra um að breyta reglum þannig að kvóti línuívilnunar nýtist að fullu. Skorað er á ráðherrann að auka löndunarprósentu línuívilnunar úr 16% í 30% svo unnt verði að nýta heimildir línuívilnunar sem eru til staðar.  Vegna niðurskurðar í aflaheimildum mun sú línuívilnun sem nú er til staðar ekki nýtast og má benda á að á síðasta fiskveiðiári nýttust ekki 2.115.041 kg af aflaheimildum vegna lágrar löndunarprósentu.


Sigurður Hreinsson tók undir þessi sjónarmið og bendir á að friðunarstefna síðustu 24 ára hefur engu skilað.  Óeðlilegt er því að hafa reglur sem miða að því að aflamark falli niður óveitt.


Rætt var um stöðu viljayfirlýsingar um samskipti við A-Grænland og óskar Atvinnumálanefnd Ísafjarðabæjar eftir að Þorgeir Pálsson framkvæmdarstjóri Atvinnuþróunarfélags Vestfjarða mæti á næsta fund til að fara yfir stöðu verkefnisins og almennt um verkefnastöðu félagsins. 2008-07-0001


Fleira ekki gert, fundargerðin upp lesin og samþykkt, fundi slitið kl. 17.30.


Kristján G. Jóhannsson, formaður.


Kári Þór Jóhannsson.


Áslaug J. Jensdóttir.


Sigurður Hreinsson.


Shiran Þórisson.



Var efnið á síðunni hjálplegt?