86% íbúa ánægðir að búa í Ísafjarðarbæ
Niðurstöðurnar könnunar á ánægju íbúa með þjónustu Ísafjarðarbæjar sýna almenna ánægju með flesta þætti í þjónustu sveitarfélagsins. Þar stendur hæst ánægja með sveitarfélagið sem stað til að búa á, þar sem 86% íbúa eru ánægðir. Sömuleiðis er mikil ánægja með sorphirðu (73%), gæði umhverfis (71%) og hvernig staðið er að menningarmálum (70%).
Þjónusta leik- og grunnskóla og þjónusta við eldri borgara fá jákvæða umsögn og eru nálægt meðaltali sveitarfélaga í heild á landsvísu.
Minnst ánægja er með skipulagsmál, þar sem 25% eru ánægð og 49% óánægð. Einnig sýna niðurstöðurnar minni ánægju með þjónustu við fatlað fólk (56%), aðstöðu til íþróttaiðkunar (54%) og þjónustu við barnafjölskyldur (53%).
Að sögn Sigríðar Júlíu Brynleifsdóttur, bæjarstjóra Ísafjarðarbæjar, verða niðurstöður könnunarinnar nýttar til að forgangsraða umbótaverkefnum í þjónustu sveitarfélagsins á komandi misserum.
„Það er gott að fá þessar niðurstöður núna þar sem vinna við að gera vinnuferla skýrari, innan og á milli sviða sveitarfélagsins, er nýhafin. Við vonum að hún skili sér í bættri þjónustu og þá aukinni ánægju.“
Niðurstöður könnunarinnar í heild
Nánar um könnunina:
Könnunin var framkvæmd af Gallup dagana 17. nóvember 2025 – 13. janúar 2026, bæði í síma og með netkönnun, og var fjöldi svarenda í Ísafjarðarbæ 151.
Í könnuninni var spurt um ánægju/óánægju með eftirfarandi þætti í þjónustu sveitarfélagsins:
- Sveitarfélagið sem staður til að búa á
- Skipulagsmál
- Gæði umhverfis í nágrenni heimilis
- Þjónusta við barnafjölskyldur
- Þjónusta grunnskóla
- Þjónusta leikskóla
- Aðstaða til íþróttaiðkunar
- Þjónusta við eldri borgara
- Þjónusta við fatlað fólk
- Hvernig sveitarfélagið sinnir menningarmálum
- Þjónusta í tengslum við sorphirðu
- Þjónusta sveitarfélagsins í heild, bæði út frá reynslu og áliti
- Úrlausn starfsfólks sveitarfélagsins á erindum
- Hvaða þjónustu þarf helst að bæta