„Það má eiginlega segja að snjóframleiðsluvélin haldi barnasvæðinu opnu,“ segir Úlfur Guðmundsson forstöðumaður skíðasvæðis Ísafirðinga. Barnasvæðið var opnað um helgina en unnið hefur verið að því að undanförnu að framleiða snjó fyrir svæðið. Úlfur reiknar með að hafa barnabrekkuna opna næstu daga og segir að það eigi ekki að skipta máli þótt það hlýni eða rigni, snjórinn sé það góður. Aðspurður hvort til standi að fjölga snjóframleiðsluvélum segir Úlfur það ekki vera inn í myndinni eins og er. „Svona vélar nota gríðarlegt magn af vatni og rafmagni, til þess að fjölga þeim þyrfti að setja upp allskonar leiðslur og dælur og það þyrfti að fjármagna það, vélin er í sjálfu sér ekki dýr en það er kerfið í kringum hana sem setur strik í reikninginn,“ segir Úlfur. Að undanförnu hafa starfsmenn skíðasvæðisins verið að framleiða snjó en vegna vatnsleysis neðarlega í brekkunni er hann framleiddur efst og honum ýtt niður.

Rúmlega hundrað manns sóttu þjóðfund sem haldinn var í Bolungarvík á laugardag. Markmið fundarins var að setja fram hugmyndir um framtíðaráform Vestfjarða til eflingar atvinnulífs og samfélags á grundvelli sérstöðu og styrkleika svæðinu. „Ísland er að fóta sig eftir hrunið og það þarf því að finna stefnuna sem á að fara. Þetta er liður í þeirri vinnu,“ segir Aðalsteinn Óskarsson, framkvæmdastjóri Fjórðungssambands Vestfirðinga. Unnið var á tólf vinnuborðum og farið yfir þær hugmyndir sem komu fram og hvernig unnt væri að framkvæma þær. Á næstu dögum verðurr farið yfir hugmyndirnar og valdar þær sem þykja eiga mesta möguleika. Þessi vinna verður grundvöllur að áætlun hvers landshluta innan þeirrar sóknaráætlunar sem ríkisstjórnin hefur ákveðið að gerð verði og tillaga til þingsályktunar hefur verið lögð fram um á Alþingi. Niðurstöður fundanna verða einnig nýttar við gerð áætlana ríkisins svo sem byggðaáætlun, ferðamálaáætlun og fjárlög fyrir árið 2011.

Sorphirðugjald er hæst á Ísafirði að því er fram kemur í könnun sem verðalagseftirlit ASÍ hefur gert á útsvari og álagningu fasteignagjalda í 15 fjölmennustu sveitarfélögum landsins. Sorphirðugjaldið á Ísafirði er 41.580.- krónur, sem er 10% hækkun frá árinu 2009. Lægsta gjaldið er í Mosfellsbæ, eða 15.000 krónur á tunnu sem er 177% lægra en á Ísafirði. Sorphirðugjald hækkar hjá öllum sveitafélögum nema Fljótsdalshéraði þar sem það lækkar um 3% og hjá Reykjavíkurborg þar sem það stendur í stað. Mesta hækkun sorphirðugjalda milli ára er í Árborg, en þar nemur hækkunin 54%, á Akranesi 46% og á Akureyri um 42%.

Búist er við að NMT- farsímakerfið verði endanlega tekið úr notkun 1. september nk. Í kjölfar uppbyggingar á GSM og uppsetningu GSM-stöðva hefur notendum NMT farsímakerfisins fækkað og jafnframt var framleiðslu notendabúnaðar hætt fyrir nokkru. NMT- kerfið hefur lengi þjónað dreifðari byggðum landsins og sjófarendum. Síminn rekur farsímakerfið og gerði rekstraleyfið ráð fyrir að kerfinu yrði lokað frá og með 1. janúar 2007 en vegna þess að fjöldi notenda í NMT-kerfinu gat ekki hagnýtt sér útbreiðslusvæði GSM, fyrr en undir síðustu mánuði, hefur lokun NMT-kerfisins verið frestað ítrekað, jafnan um ár í senn. Síminn hefur nú þegar slökkt á 15 stöðvum í NMT- farsímakerfinu en á Vestfjörðum eru þessar stöðvar á Mikladal milli Patreksfjarðar og Tálknafjarðar, Tjaldnesi í Arnarfirðir, Sandfelli í Dýrafirði, Nauteyri í Ísafjarðardjúpi, á Hólmavík og á Ennishöfða. Á næstunni verður 28 stöðvum lokað til viðbótar. 1. september verður þeim sendum sem eftir eru lokað og þá mun NMT-kerfið á Íslandi heyra sögunni til.

Foreldrar og forráðamenn Dægradvalar í Ísafjarðarbæ fengu fyrir mistök greiðsluseðil fyrir janúarmánuð þar sem innifalin var hækkun sem samþykkt var af bæjarstjórn 5. febrúar. Hópur foreldra mótmælti því að dagvistunargjöldin væru afturvirk þar sem ekki var minnst á það samþykkt bæjarstjórnar. „Það voru mistök í innheimtu að senda út seðla fyrir janúar með hækkuninni en hún er miðuð við 1. febrúar og verður það leiðrétt á næsta seðli,“ segir Margrét Halldórsdóttir, íþrótta- og tómstundafulltrúi Ísafjarðarbæjar. Hún vill þó taka fram að ekki hafi verið um beina hækkun að ræða heldur leiðréttingu á gjaldskrá.