1.         Stuðningur við frumkvöðlastarf í Ísafjarðarbæ.  2013-03-0020.

Lagt fram minnisblað frá bæjarritara dagsett 5. apríl sl., ásamt umsóknum er borist hafa um frumkvöðlastyrki hjá Ísafjarðarbæ, er lagt var fram á fundi bæjarráðs þann 8. apríl sl. Í minnisblaðinu er gerð grein fyrir umsóknum, sem borist hafa um stuðning við frumkvöðlastarf.  Umsóknafrestur rann út þann 2. apríl sl. og bárust tvær umsóknir.

            Umsókn frá Klæðakoti, Halldóru B. Norddahl og Önnu J. Hinriksdóttur, Ísafirði.

            Umsókn frá Elíasi Guðmundssyni, Suðureyri.

            Bæjarráð fól  bæjarstjóra að vinna málið frekar í samráði við atvinnumálanefnd Ísafjarðarbæjar.

Atvinnumálanefnd tekur jákvætt í innkomnar umsóknir og felur formanni atvinnumálanefndar, að leita frekari upplýsinga hjá umsækjendum, í samræmi við umræður á fundinum.

Fleira ekki gert og fundi slitið klukkan 08:45.

Ingólfur Þorleifsson, formaður. 

Steinþór Auðunn Ólafsson.                                                 

Sigríður Ólöf Kristjánsdóttir.

Þorleifur Pálsson, bæjarritari.

1. Endurskoðun á erindisbréfi nefndarinnar - tillögur að breytingum. 2012-11-0034.

Nefndin leggur til við bæjarstjórn að eftirfarandi breytingar verði gerðar á erindisbréfi hennar:

• Í stað „atvinnu- og staðardagskrárfulltrúi“ komi „starfsmaður Ísafjarðarbæjar“ í köflunum Stjórnskipuleg staða og Skipan nefndarinnar.
• Í kaflanum Hlutverk nefndarinnar eru lagðar til eftirfarandi breytingar:
  • „að eiga náið samstarf við Atvinnuþróunarfélag Vestfjarða“ verði að „að eiga náið samstarf við Fjórðungssamband Vestfirðinga og Atvinnuþróunarfélag Vestfjarða“
  • Setningin „Meginhlutverk atvinnumálanefndar er stefnumótun, en í minna mæli afgreiðsla einstakra mála. Nefndin setur starfsmönnum sem með nefndinni starfa, starfsreglur um afgreiðslu mála“ fari út.
  • Í kaflanum Starfshættir verði eftirfarandi breyting: „Um starfshætti nefnda er sérstaklega getið í III. og V. kafla samþykktar um stjórn og fundarsköp Ísafjarðarbæjar og skal þeim fylgt eftir því sem við á“ verði að „Um starfshætti nefnda er sérstaklega getið í IV. kafla bæjarmálasamþykktar Ísafjarðarbæjar og skal þeim fylgt eftir því sem við á.“
  • Í kaflanum Starfshættir verði eftirfarandi breyting á öðrum greinaskilum: „Atvinnumálanefnd kemur saman fyrir luktum dyrum á fastákveðnum fundartíma að minnsta kosti einu sinni í mánuði. Fella má niður fund ef engin mál liggja fyrir. Skal nefndin gera samþykkt um þennan fundartíma á sínum fyrsta fundi að höfðu samráði við bæjarstjóra.“
  • Í kaflanum Starfshættir verði eftirfarandi breyting: „Formaður stýrir fundum nefndarinnar skv. ákvæðum III. og V. kafla samþykkta um stjórn og fundarsköp Ísafjarðarbæjar.“ verði „Formaður stýrir fundum nefndarinnar skv. ákvæðum IV. kafla bæjarmálasamþykktar Ísafjarðarbæjar.“
  • Í kaflanum Eftirfylgni verði „Atvinnumálanefnd og atvinnu- og staðardagskrárfulltrúi hafa með höndum framkvæmd þeirrar stefnu sem mótuð hefur verið á hverjum tíma varðandi verkefni nefndarinnar.“ að „Atvinnumálanefnd og starfsmaður hennar hafa með höndum framkvæmd þeirrar stefnu sem mótuð hefur verið á hverjum tíma varðandi verkefni nefndarinnar.“
  • Í kaflanum Lög og reglugerðir þarf að breyta lagatilvísunum úr 12/1997 í 54/2006, 13/1997 í 55/2006 og 117/1994 í 73/2005. Í sama kafla verði „samþykkt um stjórn og fundarsköp Ísafjarðarbæjar“ að „bæjarmálasamþykkt Ísafjarðarbæjar“.

2. Drög að starfsmannastefnu - sent til nefnda til umsagnar. 2011-02-0053.

Nefndin gerir ekki athugasemdir við framlögð drög.

3. Önnur mál.

• Rætt um skoðanakönnun meðal atvinnurekenda í Ísafjarðarbæ

Fleira ekki gert. Fundargerð lesin upp og fundi slitið klukkan 17.00.

Ingólfur Þorleifsson, formaður.

Steinþór Auðunn Ólafsson.                                                 

Benedikt Bjarnason.

Hálfdán Bjarki Hálfdánsson, upplýsingafulltrúi.

1. Stefnumótun í atvinnumálum. 2010-08-0057

Shiran Þórisson, framkvæmdastjóri Atvinnuþróunarfélags Vestfjarða, mætir til fundar við nefndina og kynnir drög að nýrri stefnu Ísafjarðarbæjar í atvinnumálum.

Samþykkt að leggja drögin fyrir bæjarráð að lokinni frekari yfirferð AtVest og atvinnumálanefndar.

2. Könnun meðal atvinnurekenda. 2011-01-0013

Upplýsingafulltrúa falið að leggja könnunina fyrir forsvarsmenn atvinnulífsins í samræmi við umræður á fundinum.

3. Önnur mál

• Staða atvinnulífs og sjávarútvegs á Vestfjörðum

Rætt um stöðu mála í atvinnulífi á Vestfjörðum.

• Umsögn atvinnumálanefndar á frumvarpi til laga, 657. mál. 2012-04-0001

Benedikt Bjarnason lagði fram eftirfarandi bókun í tilefni af umsögn atvinnumálanefndar á frumvarpi til laga, 657. mál.

„Undirritaður vill koma á framfæri leiðréttingum við umsögn atvinnumálanefndar um frumvörp ríkisstjórnarinnar um stjórn fiskveiða og veiðigjöld.

Atvinnumálanefnd, sem fagnefnd Ísafjarðarbæjar, hefur það að markmiði að vanda vinnubrögð, en undirritaður gerir athugasemdir við umsögn nefndarinnar á frumvarpi til laga sem fram kom á 113. fundi hennar 13. apríl 2012.

Frumvarp það sem nú liggur fyrir Alþingi um stjórn fiskveiða byggir í flestum atriðum á niðurstöðu svokallaðrar sáttanefndar, sem starfaði undir forystu Guðbjarts Hannessonar á árunum 2009-2010, með aðild allra hagsmunaaðila í sjávarútvegi og allra stjórnmálaflokka. Niðurstaða nefndarinnar byggði á aflamarkskerfi með nýtingarsamningum við útgerðina og hliðarráðstöfunum til að styðja byggðir og nýliðun. Auk þess var niðurstaða nefndarinnar sú að ráðstöfunarréttur fiskveiðiauðlindarinnar væri í höndum þjóðarinnar. Öll þessi atriði er að finna í frumvarpi ríkisstjórnarinnar.

Því er haldið fram að upptaka veiðigjalds, auðlindagjalds fyrir nýtingu fiskistofnanna, muni líklega lækka laun sjómanna og verkafólks og þannig minnka tekjur sveitarfélaga. Þvert á móti gerir frumvarp um veiðigjöld ráð fyrir að allur rekstrarkostnaður, þar með talin laun, dragist frá þeim stofni sem notaður er til að reikna út sérstaka veiðigjaldið. Þess vegna má halda því fram að frumvarpið auðveldi útgerðinni að hækka laun sjómanna og verkafólks, án þess að það skerði rekstrarhæfni þeirra.

Undirritaður er sammála þeirri grundvallarreglu að þeir sem nýti auðlindir þjóðarinnar greiði fyrir það sanngjarnt auðlindagjald. Frumvarp um veiðigjöld gerir ráð fyrir að tengja gjaldið við afkomu sjávarútvegsins. Það er eðlilegra að hluti af þeim arði sem skapast í sjávarútvegi renni í sameiginlega sjóði landsmanna, heldur en að hann lendi í vösum örfárra einstaklinga. Með þeim hætti er meiri von til þess að þeir fjármunir skili sér í mikilvæg samfélagsleg verkefni, svo sem samgönguframkvæmdir.

Með þessari bókun vill undirritaður leggja sitt af mörkum til hlutlausrar og upplýstrar umræðu um sjávarútvegsmál.“

• Auglýsingar á vegum Ísafjarðarbæjar. 2012-05-0046.

Benedikt Bjarnason lagði fram eftirfarandi spurningar varðandi auglýsingar á vegum Ísafjarðarbæjar:

„1. Hver hefur kostnaður Ísafjarðarbæjar verið vegna birtinga á auglýsingum, sundurliðað vegna einstakra fjölmiðla.

       a. árið 2010

       b. árið 2011

       c. janúar til apríl 2012

Hér er átt við allar auglýsingar og kynningar í fjölmiðlum, vegna útboða, atvinnuumsókna, viðburða eða annarra birtinga.

2. Hefur verið mótuð stefna um það hvernig birtingum er hagað á auglýsingum bæjarins og hvaða miðlar eru valdir til að birta ákveðnar tegundir auglýsinga og í hvers eða hverra höndum er að taka ákvarðanir um birtingu auglýsinga og kynninga á vegum Ísafjarðarbæjar?“

Fleira ekki gert. Fundargerð lesin upp og fundi slitið klukkan 17.45.

Ingólfur Þorleifsson, formaður.

Steinþór Auðunn Ólafsson.                                                 

Benedikt Bjarnason.

Hálfdán Bjarki Hálfdánsson, upplýsingafulltrúi.                                                 

Shiran Þórisson.

1. Frumvarp til laga um stjórn fiskveiða – Beiðni um umsögn á frumvarpi til laga, 657. mál. 2012-04-0001

Lögð fram áætlun Atvinnuþróunarfélags Vestfjarða á veiðigjaldi útgerða á Vestfjörðum miðað við áhrif frumvarpsins. Áætlunin er flokkuð annars vegar eftir skipum og hins vegar eftir höfnum.

Nefndin leggur til eftirfarandi umsögn um frumvarpið:

„Atvinnumálanefnd Ísafjarðarbæjar telur að verulegir annmarkar séu á frumvarpi því sem er til umsagnar.

Um 87 prósent af aflaheimildum sem úthlutað var 1. september 2011 eru á landsbyggðinni og því má ætla að þessar breytingar munu koma harðast niður þar.

Þær greinar þessa frumvarps er varða nýtingarsamninga og pottafyrirkomulag eru greinar sem væntanlega verður hægt að ná einhverri sátt um innan sjávarútvegsins. Með nýtingarsamningum til 20 ára, og möguleika á framlengingu, ættu fyrirtæki að geta skipulagt sig til framtíðar.

Skerðing á aflaheimildum núverandi handhafa til að mynda potta fyrir nýliða er þó eitthvað sem ekki er sátt um. Þar er í einhverjum tilfellum verið að hygla áhugamönnum á kostnað atvinnumanna. Illskárri kostur væri að  hluti fyrirsjáanlegrar aukningar á aflamarki á næstu árum færi í þá potta sem kerfið kveður á um.

Fjöldi umsagnaraðila hefur nú þegar lýst efasemdum sínum við þennan kafla frumvarpsins. Endurskoðunarfyrirtækið Deloitte&Touche hefur sent frá sér greinargerð þar sem fram kemur hvaða áhrif þetta veiðigjald mun hafa.

Bankar, samtök fiskvinnslustöðva, Landsamband íslenskra útvegsmanna, Landssamband smábátaeigenda og fjölmargir aðrir hafa sagt að þess háttar gjaldtaka muni hafa verulega neikvæð áhrif á þau fyrirtæki sem nú starfa innan greinarinnar.

Líklegt er að störfum muni fækka enn frekar en orðið er og laun lækka hjá sjómönnum og fiskvinnslufólki, sem hafa mun áhrif á útsvar sveitarfélaga. Þá mun draga verulega úr fjárfestingu fyrirtækja í greininni með tilheyrandi afleiðingum fyrir minni þjónustufyrirtæki.

Á Vestfjörðum var auðlindagjaldið á síðasta ári 255 milljónir. Með nýja frumvarpinu verður það hins vegar um 1,4 milljarðar, þar af 1,2 milljarðar á norðanverðum Vestfjörðum, samkvæmt útreikningum Atvinnuþróunarfélags Vestfjarða. Nefndin getur ekki samþykkt svo mikla aukningu á skattheimtu af burðarfyrirtækjum á svæðinu, sérstaklega ekki meðan ótryggt er að nokkuð af þeim tekjum skili sér aftur til uppbyggingar í Ísafjarðarbæ. Eins er engin vissa fyrir því að það sem skilar sér vegi upp það tap sem sveitarfélög verða fyrir vegna þess útsvars sem tapast.

Til þess að einhver sátt megi nást um fiskveiðar og  nýtingu úr þjóðareign Íslendinga þarf að huga að samráði við alla hagsmunaaðila og breiðri sátt alls Alþingis. Með þessum athugasemdum nefndarinnar er ekki verið að lýsa stuðningi við óbreytt kerfi heldur verið að kalla eftir nánari skoðun á afleiðingum breytinganna og meiri sátt allra sem að málinu koma.

Sáttarnefnd allra flokka á Alþingi náði niðurstöðu  þar sem allir nefndarmenn voru sammála um ákveðnar leiðir til breytinga á fiskveiðistjórnunarkerfinu. Í þessari stjórnartillögu er á engan hátt litið til þeirrar vinnu sem þar var unnin. Ekkert samráð var haft við hagsmunaaðila innan útgerðar eða fiskvinnslu við gerð frumvarpsins. Það  sýnir að stjórnvöld ætla sér að ná fram breytingum á kerfinu án þess að kynna sér til fulls þær alvarlegu afleiðingar sem það mun hafa í för með sér fyrir landsbyggðina.“

2. Könnun meðal atvinnurekenda. 2011-01-0013

Rætt um fyrirkomulag könnunarinnar. Upplýsingafulltrúa falið að vinna áfram að málinu.

3. Önnur mál

• Stefnumótun í atvinnumálum. 2010-08-0057

Rætt um þá vinnu sem er í gangi varðandi stefnumótun í atvinnumálum.

Fleira ekki gert. Fundargerð lesin upp og fundi slitið klukkan 09.30.

Ingólfur Þorleifsson, formaður.

Steinþór Auðunn Ólafsson.                                                        

Sigríður Ó Kristjánsdóttir.

Hálfdán Bjarki Hálfdánsson, upplýsingafulltrúi.                     

1. Almenningssamgöngur í Ísafjarðarbæ – Lagt fram bréf bæjartæknifræðings vegna útboðs almenningssamgangna í Ísafjarðarbæ. 2012-02-0018.

Nefndin leggur til að tekin verði upp sérstök afsláttarkjör fyrir námsmenn á aldrinum 16-25 ára. Ennfremur leggur nefndin til að gjaldtaka verði áfram sú sama óháð akstursleið.

2. Umsögn um frumvarp til laga um stjórn fiskveiða – bréf frá nefndarsviði Alþingis. 2012-02-0034.

Nefndin sér ekki ástæðu til að fjalla um málið.

3. Reglur um stuðning við frumkvöðla og fyrirtæki sem vilja auka starfsemi sína – Bréf frá Samkeppniseftirlitinu. 2011-02-0032.

Nefndin leggur til við bæjarstjórn að gengið verði frá fjármögnun styrkja samkvæmt nýsamþykktum reglum.

4. Önnur mál

• Benedikt Bjarnason lagði fram eftirfarandi bókanir:

       Bærinn upplýsi um fjárframlög til atvinnuþróunar og nýsköpunar síðastliðin þrjú ár. Hvaða aðilar hafa fengið fjárframlög, styrki eða aðrar ívilnanir. Upphæðir verði sundurliðaðar.

       Bærinn upplýsi um fjárframlög til ferðamála síðastliðin þrjú ár.  Hvaða aðilar hafa fengið fjárframlög, styrki eða aðrar ívilnanir.  Upphæðir verði sundurliðaðar.

       Bærinn upplýsi um fækkun stöðugilda hjá Ísafjarðarbæ vegna niðurskurðar hjá bænum og hvort hún hafi áhrif á útsvarstekjur bæjarins.

       Hver hefur verið kostnaður Ísafjarðarbæjar við almenningssamgöngur í Ísafjarðarbæ, sundurliðað eftir ferðaleggjum?

Fleira ekki gert. Fundargerð lesin upp og fundi slitið klukkan 17.20.

Ingólfur Þorleifsson, formaður.

Steinþór Auðunn Ólafsson.                                                                 

Benedikt Bjarnason.

Hálfdán Bjarki Hálfdánsson, upplýsingafulltrúi.

1. Stefna Ísafjarðarbæjar í atvinnumálum. 2010-08-0057.

Á fund atvinnumálanefndar er mættur Shiran Þórisson, fulltrúi Atvinnuþróunarfélags Vestfjarða, til að kynna vinnu við stefnumótum í atvinnumálum.

Nefndin felur upplýsingafulltrúa og fulltrúa AtVest að vinna áfram að málinu með öðrum nefndum Ísafjarðarbæjar.

Fleira ekki gert og fundi slitið klukkan 17.38.

Ingólfur Þorleifsson, formaður.

Sigurður Hreinsson.                                                                             

Benedikt Bjarnason.

Hálfdán Bjarki Hálfdánsson, upplýsingafulltrúi. 

Shiran Þórisson.

Dagskrá fundarins:

1. Umsögn um frumvarp til laga um stjórn fiskveiða, 839. mál.

Tilvísun frá bæjarráði. 2011-07-0027.

Nefndin kemur sér ekki saman um umsögn um frumvarpið.

Sigurður Hreinsson lét bóka eftirfarandi:

„Umsögn Atvinnumálanefndar Ísafjarðarbæjar um frumvarp til laga um stjórn fiskveiða, mál 839.  Vísað til nefndarinnar frá bæjarráði.

Í mörg ár hafa staðið yfir deilur um stjórnun fiskveiða við Ísland og hafa sjónarmið hagsmunaraðila verið ólík og illsættanleg.  Þess ber að geta að með orðinu „hagsmunaraðilar“ er ekki eingöngu átt við einsleitan hóp stórútgerða með vinnslu sem hafa yfir að ráða umtalsverðu magni kvóta.  Hagsmunaraðilar eru ekki síður mikill fjöldi sveitarfélaga, íbúar í hinum dreifðu sjávarbyggðum landsins, vinnslur án útgerða, útgerðir án vinnslu, útgerðir án kvóta, sjómenn, landverkafólk og þannig má lengi, lengi telja.

Í annarri grein laganna (b lið) eru ákvæði sem gefa heimamönnum ákveðinn forgang að kvóta í því sveitarfélagi, en ekki ótakmarkaðan forgang líkt og núverandi kerfi gerir.  Lögin eiga að tryggja að afli hvers sveitarfélags fari um hafnir þess og tryggja með þeim hætti viðkomandi sveitarfélagi tekjur bæði af kvótaleigu og af hafnargjaldi.  Í sömu grein eru jafnframt tilteknar undanþágur gagnvart þeim sem fjárfesta í nýjum skipum, um að möguleiki sé á kvótaleigu til allt að fimm ára.  

Þá er í sömu grein (lið d) ákvæði sem tryggja jafnan aðgang allra fiskvinnsla að öllum lönduðum afla.  Verðmyndum á fiski er gerð gegnsæ með því að allur afli fari um fiskmarkaði sem tryggir að samkeppnisstaða innan vinnslugreinarinnar er á jafnréttisgrundvelli og að þau fyrirtæki sem undirbjóða önnur á neytendamörkuðum eru ekki að gera það á grundvelli lægra fisksverðs frá eigin útgerð.  Með þessum ákvæðum er staða sjómanna jöfnuð verulega frá því sem nú er og ekki síður samkeppnisstaða fiskvinnslanna.

Í fjórðu grein er fjallað um strandveiðar.  Tilkoma strandveiða er mikilvægt skerf í tilliti atvinnuréttar og ekki síður sem aðferð til að koma nýjum aðilum inn í greinina.  Öll frekari þróun á því kerfi er jákvæð og hvetjandi fyrir þá aðila sem hyggjast hefja sín fyrstu skref í sjálfstæðum rekstri í sjávarútvegi.

Í 5. grein er tekið á þeim þætti sem snýr að skuldastöðu sjávarútvegsins vegna kvótakaupa.  Ljóst er að það verð sem hefur viðgengist á kvóta, er í engu samræmi við fjárhagslegan ávinning af auknum veiðiheimildum.  Sú gríðarlega útlánaaukning sem bankakerfið stóð fyrir á árunum 2003-2008 var ekki nema á mjög takmarkaðan hátt að þjóna sjávarútveginum, heldur fyrst og fremst bönkunum sjálfum með þeim tilgangi að fénýta greinina.  Skuldir sjávarútvegsins eru verulega íþyngjandi fyrir greinina.  Raunar hafa sérfræðingar hjá Háskólanum á Akureyri sýnt fram á það með greiningum sínum á skuldaaukningu greinarinnar á áðurnefndu tímabili, að mjög lítill hluti þeirra skulda nýttist til að auka hagkvæmni greinarinnar í heild.  Fjárfesting í rekstrarfjármunum stóð í stað á umræddu tímabili og má leiða að því líkum að hafi einhverjir aðilar notið góðs af þessari skuldaaukningu, hafi það örugglega komið niður á öðrum aðilum innan greinarinnar.  Ótakmarkað framsal og óbein veðsetning á aflaheimildum stuðlaði þannig að fjármálalegum óstöðugleika og slæmri nýtingu á fjármunum í aðdraganda hrunsins.

Í greinargerð með frumvarpinu er að lokum tiltekin nauðsyn þess að óháð endurskoðun verði gerð á aðferðafræði og árangri fiskifræðinga Hafró.  Á tuttugu ára tímabili, 1952-1972, voru veidd að meðaltali yfir 450 þúsund tonn af þorski árlega.  Þegar Hafró tók til við að stjórna fiskveiðum í lok þess tímabils, var markmið þeirra að árleg veiði þorsks myndi aukast í 550 þúsund tonn.  Aflaheimildir í þorski á yfirstandandi fiskveiðiári eru hinsvegar ekki nema 160 þúsund tonn.  Það gerir árangur upp á 30% af markmiðum og 35% af þekktri veiðigetu þorsksstofnsins.  Ljóst má telja að aðferðafræði Hafró er kolröng og þjóðhagsleg nauðsyn þess að nýta fiskistofnana betur er gríðarleg.  Miðað við það gríðarlega fiskmagn sem hefur verið á miðum allt í kringum landið á þessu ári hefði að ósekju mátt veiða a.m.k. 200 þúsund tonnum meira af þorski.  Reiknað í gjaldeyri, gerir það upphæð nálægt 100 milljörðum króna í aukningu útflutningstekna.

Það er álit undirritaðs/nefndarinnar að af þeim frumvörpum sem komið hafa fram um stjórn fiskveiða frá upptöku kvótakerfisins, gangi þetta tiltekna frumvarp þingmanna Hreyfingarinnar hvað lengst í þá átt að sætta sjónarmið ólíkra hagsmunaraðila og tryggja á sama tíma viðurkennd viðmið í atvinnufrelsi og samkeppnismálum.“

Ingólfur Þorleifsson formaður lét bóka eftirfarandi:

„Eins og álit hagfræðinga hafa sýnt þá eru allar kollsteypur á kerfinu ekki vænlegar til árangurs. Skýrslur sýna jafnframt að upptaka aflaheimilda mun koma af stað fjöldagjaldþroti innan greinarinnar, og valda ómældum skaða. Í þessu frumvarpi koma þó  fram veigamikil atriði sem hafa verið í umræðunni um upptöku skulda þeirra útgerða sem keypt hafa veiðiheimildir og skuldsett sig vegna þess, samhliða upptöku veiðiheimilda.  Það hlýtur að vera forsenda áframhaldandi reksturs fjölda fyrirtækja sem verða fyrir upptöku aflaheimilda.

Ég tel þó að ef fara á í breytingar á kerfinu þá eigi þær að vera í anda tillagna sáttanefndarinnar svokölluðu sem skipuð var fulltrúum allra stjórnmálaflokka, sem vann skýrslu um málið, og skilaði samhljóða tillögum um leiðir til breytinga á fiskveiðistjórnarkerfinu.“

2. Önnur mál

• Virðisaukinn 2011

Ákveðið að Virðisaukinn verði veittur mánudaginn 22. ágúst.

Fleira ekki gert og fundi slitið klukkan 17.12

Ingólfur Þorleifsson, formaður

Sigurður Hreinsson

Sigríður Ó. Kristjánsdóttir

Hálfdán Bjarki Hálfdánsson, upplýsingafulltrúi

1. Umsögn um frumvarp til laga um stjórn fiskveiða, 839. mál. Tilvísun frá bæjarráði. 2011-07-0027.

Afgreiðslu málsins frestað fram á næsta fund nefndarinnar sem haldinn verður þriðjudaginn 2. ágúst.

2. Virðisaukinn, frumkvöðlaverðlaun Ísafjarðarbæjar. Tillögur nefndarmanna lagðar fram, þær ræddar og verðlaunahafi ákveðinn. 2011-02-0032.

Ákveðið að verðlaunin verði afhent síðar í mánuðinum.

3. Skoðanakönnun meðal atvinnurekenda. Listi yfir atvinnurekendur og tillögur að eftirfylgni lagðar fram af upplýsingafulltrúa. 2011-01-0013.

4. Önnur mál

• Samgöngur innan Ísafjarðarbæjar

       Rætt um mikilvægi almenningssamgangna milli byggðarkjarna í sveitarfélaginu með    tilliti til þarfa íbúa og fyrirtækja.

Fleira ekki gert og fundi slitið klukkan 09.45.

Ingólfur Þorleifsson, formaður.

Sigurður Hreinsson.                                                                           

Benedikt Bjarnason.

Hálfdán Bjarki Hálfdánsson, upplýsingafulltrúi.

Dagskrá fundarins:

1. Stefnumörkun í atvinnumálum. Fulltrúi Atvinnuþróunarfélags Vestfjarða gerir atvinnumálanefnd og bæjarráði grein fyrir þróun mála. 2010-08-0057

Shiran Þórisson fór yfir stöðu mála. Að þessum lið loknum hélt atvinnumálanefnd fundi sínum áfram í fundarsal Skóla- og fjölskylduskrifstofu.

2. Vettvangsferð Bjarka Gunnars Halldórssonar arkitekts um Suðureyri. Tilvísun frá umhverfisnefnd. 2010-12-0002

Atvinnumálanefnd fagnar framkominni skýrslu Bjarka Gunnars og Sjávarþorpsins á Suðureyri og felur upplýsingafulltrúa að kanna mögulega aðkomu Ísafjarðarbæjar að verkefninu.

3. Sjálfsalar á tjaldsvæðinu í Tungudal, fjáröflun 3. flokks BÍ. Erindin frá Héraðssambandi Vestfjarða.

Atvinnumálanefnd gerir ekki athugasemd við umsóknina.

4. Önnur mál

• Tjaldsvæði á Suðureyri

Atvinnumálanefnd telur mikilvægt að Ísafjarðarbær sjái til þess að rekin séu tjaldsvæði í öllum byggðarkjörnum sveitarfélagsins. Nefndin felur upplýsingafulltrúa að kanna hvers vegna bærinn kemur ekki að rekstri tjaldsvæðis á Suðureyri í sumar.

Fleira ekki gert og fundi slitið klukkan 10.20.

Ingólfur Þorleifsson, formaður.

Sigurður Hreinsson.                                                                           

Benedikt Bjarnason.

Hálfdán Bjarki Hálfdánsson, upplýsingafulltrúi.

Dagskrá fundarins:

1. Reglur um frumkvöðlastyrki. 2011-02-0032

Nefndin felur upplýsingafulltrúa að breyta drögum að reglum í samræmi við umræður á fundinum og leggja fyrir bæjarstjórn.

2. Skoðanakönnun meðal atvinnurekenda. 2011-01-0013

Nefndin leggur til að ráðist verði í skoðanakönnun eftir þeim spurningalista sem gengið var frá á fundinum. Stefnt er að könnunum á hálfs árs fresti og þannig reynt að fá fram einhvers konar væntingarvísitölu atvinnulífs á svæðinu.

3. Erindi frá iðnaðarnefnd Alþingis - Umsögn um frumvarp til laga um ferðamálaáætlun 2011-2020, 467. mál. 2011-03-0159

Nefndin bendir á að frumvarpið gerir ráð fyrir mun betri samgöngum en til staðar eru á Vestfjörðum.  Án úrbóta á því sviði telur nefndin forsendur frumvarpsins brostnar. Að öðru leyti sér nefndin ekki ástæðu til að gera athugasemdir við frumvarpið.

4. Önnur mál

• Fundir með atvinnurekendum 2011-02-0031

Nefndin felur upplýsingafulltrúa að boða til fundar með atvinnurekendum föstudaginn 15. apríl næstkomandi.

• Áskorun til sjávarútvegsráðherra

Atvinnumálanefnd Ísafjarðarbæjar fer þess á leit við bæjarstjórn að hún skori á sjávarútvegsráðherra að fara í heildarendurskoðun á nýtingu og vöktun á  rækjustofninum í Ísafjarðardjúpi, í samvinnu við heimamenn.

Veiðar og vinnsla á rækju úr Ísafjarðardjúpi hefur í  gegnum tíðina verið stóriðnaður og hefur á stundum skapað um eða yfir 100 ársverk á svæðinu. Aflaverðmæti ársafla miðað við meðalveiði úr stofninum má áætla í kringum 300 milljónir fyrir utan þá verðmætaaukningu sem verður við vinnslu, og munar svæðinu um minna. Í því ljósi verður að teljast algerlega óásættanlegt að vöktun á ástandi stofnsins og áhrif annarra stofna á rækjustofninn, skulu vera metið með nokkrum rannsóknartogum örfáa vor- og haustdaga.

Því er það tillaga nefndarinnar að gefin verði út rannsóknarveiðileyfi með það að markmiði að fá meiri vitneskju um hitastig sjávar, magn fisks á búsvæði rækjunnar, magn og dreifingu rækjustofnsins og aðra þá þætti sem áhrif kunna að hafa á stofnstærð rækjunnar og nýtingarmöguleika. Jafnframt er nauðsynlegt að kanna með hvaða hætti þeim veiðileyfum sem farin eru af svæðinu, verður komið aftur til heimamanna og tryggja með því að virðisaukinn af nýtingu stofnsins verði til að efla atvinnulíf og byggð á Vestfjörðum.

• Fundur ríkisstjórnar á Ísafirði

Í tilefni af fundi ríkisstjórnar Jóhönnu Sigurðardóttur á Ísafirði 5. apríl 2011 vill atvinnumálanefnd Ísafjarðarbæjar lýsa yfir ánægju með þá áherslu sem ríkisstjórnin lagði á eflingu atvinnu og byggðar á Vestfjörðum.

Sérstaklega vill atvinnumálanefnd hvetja ríkisstjórnina til að fylgja eftir hugmyndum um úrbætur í raforkumálum, um lækkun húshitunarkostnaðar og um jöfnun flutningskostnaðar. Raunhæfar úrbætur í þessum málum munu styrkja atvinnulíf á Vestfjörðum og auka samkeppnishæfni svæðisins.

Atvinnumálanefnd Ísafjarðarbæjar fagnar ákvörðun ríkisstjórnarinnar um tveggja ára þróunar- og uppbyggingarverkefni í menntamálum og rannsóknum. Þar er stefnt að því að efla mannauð, samþætta og styrkja grunnstoðir og vinna að nýsköpun með samstarfi háskóla-, þekkingar- og fræðasetra á Vestfjörðum. Framtíð byggðar og atvinnulífs á Vestfjörðum byggir ekki síst á því að styrkja þær stofnanir og fyrirtæki sem byggja á rannsóknar- og þróunarvinnu. Það hefur sannast víða um heim að dyggur stuðningur ríkisvaldsins er ein forsenda uppbyggingar á þessu sviði.

Fleira ekki gert og fundi slitið klukkan 18.00.

Ingólfur Þorleifsson, formaður.

Sigurður Hreinsson.                                                                           

Benedikt Bjarnason.

Hálfdán Bjarki Hálfdánsson, upplýsingafulltrúi.