Árið 2005, þriðjudaginn 17. maí kl. 17:00 kom bæjarráð Ísafjarðarbæjar saman til fundar í fundarsal bæjarstjórnar í Stjórnsýsluhúsinu á Ísafirði.

Fræðslunefnd 10/5. 219. fundur.
Fundargerðin er í þrettán liðum.
Fundargerðin lögð fram til kynningar.

Starfshópur um skipulagsmál á hafnarsvæði á Ísafirði 13/5. 6. fundur.
Fundargerðin lögð fram til kynningar.

Lagt fram bréf frá Jóhanni B. Helgasyni, bæjartæknifræðingi og Þorbirni Sveinssyni, slökkviliðsstjóra, dagsett 6. maí s.l., er varðar kaup á slökkvibifreið fyrir Ísafjarðarbæ. Í bréfinu kemur m.a. fram að slökkviliðsstjóri hafi óskað eftir tilboði frá fyrirtækinu Ólafi Gíslasyni & Co. hf. í slökkvibifreið, sem uppfyllir öll skilyrði er hann fer fram á. Tilboð hefur borist frá ofangreindum aðila upp á kr. 15.470.259.- og er mat undirritaðra að tilboðið sé mjög hagstætt. Á fjárhagsáætlun eru kr. 15.000.000.- en ekki er talin þörf fyrir aukafjárveitingu vegna kaupanna. Bæjartæknifræðingur og slökkviliðsstjóri leggja til að ofangreindu tilboði frá Ólafi Gíslasyni & Co. hf., verði tekið.

Bæjarráð samþykkir tillögu bæjartæknifræðings og slökkviliðsstjóra um kaup á ofangreindri slökkvibifreið.

Lagt fram bréf frá Ragnari Ragnararssyni, verkefnisstjóra á tæknideild, dagsett 10. maí s.l., er varðar tilboð í viðhald utanhúss á leikskólanum á Suðureyri.

Eftirfarandi tilboð bárust.
Bjarndís Friðriksdóttir, Ísafirði. kr. 1.425.780.-
GG málningarþjónusta ehf., Ísafirði. kr. 1.106.000.-
Kostnaðaráætlun kr. 979.497.-

Lagt er til að gengið verði til samninga við lægstbjóðanda GG málningarþjónustu ehf., á grundvelli tilboðs fyrirtækisins.
Bæjarráð samþykkir tillögu verkefnisstjóra vegna viðhalds leikskólans á Suðureyri.

Á 181. fundi bæjarstjórnar Ísafjarðarbæjar þann 12. maí s.l., vísaði forseti 2. lið í 67. fundargerð landbúnaðarnefndar til bæjarráðs, til frekari umfjöllunar. Um er að ræða reglur og gjaldskrá um frístundabúskap utan lögbýla í Ísafjarðarbæ.

Bæjarráð leggur til að í tillögu landbúnaðarnefndar um leyfisveitingu komi leyfishafi í stað einstaklingur. Bæjarráð gerir ekki aðrar athugasemdir við tillögur landbúnaðarnefndar.

Lagt fram bréf Ingibjargar Maríu Guðmundsdóttur dagsett 12. maí s.l., þar sem hún óskar afnota af gömlum túnum og eða afréttum fyrir hrosshaga að sumri í námunda við hesthúsahverfið í Hnífsdal. Bréfinu fylgir teikning er sýnir umrætt svæði.

Bæjarráð vísar erindinu til umsagnar landbúnaðarnefndar og byggingarfulltrúa.

Lagt fram bréf frá Náttúrustofu Vestfjarða dagsett 10. maí s.l., þar sem verkefnis- stjórn ráðstefnunnar ,,Náttúra Vestfjarða og ferðamennska", sem haldin var á Ísafirði dagana 15. og 16. apríl s.l., þakka þann stuðning sem Ísafjarðarbær sýndi við ráðstefnuhaldið.

Lagt fram til kynningar.

Lagt fram bréf frá Ólöfu Guðný Valdimarsdóttur f.h. vinnuhóps um alþjóðlega rannsóknarstofnun á sviði loftlagsbreytinga á Íslandi, dagsett þann 8. maí s.l. Um það bil ár er nú liðið frá því vinna hófst við stofnun alþjóðlegrar rannsóknarstofnunar á sviði loftslagsbreytinga sem staðsett yrði á Ísafirði. Í bréfinu er þess óskað að Ísafjarðarbær sjái sér fært að greiða hluta kostnaðar með framlagi upp á krónur sex-átta hundruð þúsund.

Bæjarráð leggur til við bæjarstjórn að Ísafjarðarbær taki þátt í verkefninu. Jafnframt samþykkir bæjarráð nú framlag að upphæð kr. 250.000.-, sem bókað verði á liðinn 21-81-995-1 í fjárhagsáætlun.

Lagt fram bréf frá Sjóvá-Almennum tryggingum hf., dagsett 3. maí s.l., þar sem félagið óskar eftir að fá að gera tilboð í vátryggingar sveitarfélagsins fyrir næstu endurnýjun þeirra.

Lagt fram til kynningar.

Lagt fram bréf Hönnu Ástvaldsdóttur og Þórs Gunnarssonar dagsett 8. maí s.l., en þau eru eigendur að húseigninni Aðalstræti 29, Þingeyri. Í bréfinu óska ofanrituð eftir styrk frá Ísafjarðarbæ til flutnings hússins á lóðinni og til endurbyggingar þess. Beiðni um styrk er með tilvísun til reglna um auglýsingu og sölu gamalla húsa í eigu Ísafjarðarbæjar, þótt það komi ekki fram í bréfinu.

Bæjarráð vísar til samþykktra reglna varðandi auglýsingu og sölu gamalla húsa og felur bæjarstjóra að vinna að málinu.

Lagt fram bréf frá Eignarhaldsfélagi Brunabótafélagi Íslands dagsett þann 6. maí s.l. og varðar ágóðahlutagreiðslu ársins 2005. Í bréfinu kemur fram að hlutdeild Ísafjarðarbæjar í ágóðahlut er 4,820% eða fyrir árið í ár kr. 21.690.000.-

Bæjarráð vísar bréfinu til endurskoðunar á fjárhagsáætlun 2005.

Lagt fram bréf frá stjórn Minjasjóðs Önundarfjarðar dagsett 12. maí s.l., þar sem óskað er staðfestingar á breytingum skipulagsskrár fyrir Minjasjóð Önundarfjarðar og um tilnefningu tveggja stjórnarmanna. Bréfinu fylgir skipulagsskrá dagsett 3. maí 2005 og skipulagsskrá dagsett í maí 1985, ásamt öðrum gögnum til upplýsinga.

Bæjarráð leggur til við bæjarstjórn að ný skipulagsskrá fyrir Minjasjóð Önundarfjarðar verði samþykkt.
Bæjarráð vísar tilnefningu í stjórn Minjasjóðsins til afgreiðslu bæjarstjórnar.

Lögð fram 87. fundargerð skólanefndar Menntaskólans á Ísafirði frá 18.04.05.

Lagt fram til kynningar.

Lagt fram bréf Sigurbjargar Árnadóttur, framkvæmdastjóra verkefnisins ,,Knörrin-hafið-síldin", samstarfsverkefni Normanna og Íslendinga, í ferðaþjónustu byggðaþróun og nýsköpun, er byggir á sameiginlegri sögu og menningararfi þjóðanna. Þátttökubæir á Íslandi eru Ísafjörður, Siglufjörður, Seyðisfjörður, sem og slóðir Ingólfs Arnarsonar á Suðurlandi og í Reykjavík. Í Noregi eru þátttakendur allir í einu fylki, Sogn og Fjordane. Í bréfinu er farið fram á þátttöku Ísafjarðarbæjar í verkefninu, sem og fjárstuðning.

Bæjarráð vísar erindinu til atvinnumálanefndar og til kynningar í menningarmála- nefnd.

Fleira ekki gert, fundarbókun upp lesin og samþykkt. Fundi slitið kl. 18:33

Þorleifur Pálsson, ritari.

Guðni G. Jóhannesson, formaður bæjarráðs.

Ragnheiður Hákonardóttir. Lárus G. Valdimarsson.

Magnús Reynir Guðmundsson, áheyrnarfulltrúi.

Halldór Halldórsson, bæjarstjóri.