Árið 2001, miðvikudaginn 25. apríl kl. 17:00 hélt atvinnumálanefnd Ísafjarðarbæjar fund á skrifstofu Ísafjarðarbæjar í Stjórnsýsluhúsinu á Ísafirði. Mættir voru undirritaðir.

Lagt fram bréf frá Halldóri Halldórssyni, bæjarstjóra, dagsett 27. febrúar s.l., þar sem bæjarráð vísar erindi frá landbúnaðarnefnd Alþingis, um frumvarp til breytinga á lögum um lax- og silungsveiðar, til umsagnar atvinnumálanefndar.

Atvinnumálanefnd tekur undir afgreiðslu umhverfisnefndar Ísafjarðarbæjar á þessu erindi samkvæmt 8. lið í 127. fundargerð umhverfisnefndar frá 7. mars s.l., en þar segir. „Umhverfisnefnd telur óeðlilegt að ríkisvaldið geti veitt leyfi fyrir fiskeldi í sjó án þess að nærliggjandi sveitarstjórnir hafi nokkuð um málið að segja, enda gætu verulegir hagsmunaárekstrar komið upp.“
Atvinnumálanefnd óskar eftir að athugasemd nefndanna verði komið á framfæri við landbúnaðarnefnd Alþingis.

Lagt fram bréf frá Halldóri Halldórssyni, bæjarstjóra, dagsett 12. mars s.l., þar sem bæjarráð vísar erindi Íslenskra Kraftamanna frá 26. febrúar s.l., til atvinnumálanefndar.
Í bréfi Íslenskra Kraftamanna er óskað eftir sambærilegri aðstoð og styrk, til að halda Vestfjarðavíking 2001 í Ísafjarðarbæ, eins og var s.l. tvö ár.

Lagt fram til kynningar nú, en atvinnu- og ferðamálafulltrúa falið að leita ákveðinna upplýsinga fyrir næsta fund nefndarinnar.

Lagt fram bréf frá menningarmálanefnd, dagsett 11. apríl s.l., þar sem nefndin vísar umsókn Gísla Hjartarsonar um styrk til atvinnumálanefndar. Í umsókninni sækir Gísli um styrk upp á kr. 150.000,- vegna ritstarfa sinna nú í vetur, undanfarin ár og í framtíðinni. Einkum er höfðað til þeirra ritstarfa er Gísli hefur unnið við útgáfu á Ársriti Útivistar, er fjallar um Hornstrandir norðan Djúps, frá Kaldalóni, vestur, norður og austur um til Ingólfsfjarðar í Strandasýslu, ásamt Drangajökli og aðliggjandi hálendi. Stærstur hluti þessa svæðis sem gerð eru skil á eru í Ísafjarðarbæ, það er fyrrum Snæfjalla-, Sléttu- og Grunnavíkurhreppum. Fram kemur að Gísli hefur ekki þegið greiðslur fyrir þessi störf sín.

Að mati atvinnumálanefndar hefur ofangreint framtak Gísla verulegt gildi fyrir ferðaþjónustu í Ísafjarðarbæ. Því samþykkir nefndin að veita Gísla viðurkenningu að upphæð kr. 50.000,- er færist á liðinn 13-61-407-1.

Atvinnumálanefnd stefnir á að standa fyrir ráðstefnu um atvinnumál í Ísafjarðarbæ með áherslu á nýsköpun. Drög að dagskrá verði lögð fyrir næsta fund nefndarinnar er verður 9. maí n.k.
Þá mun atvinnumálanefnd heimsækja nokkur fyrirtæki í Ísafjarðarbæ í maímánuði og kynna sér starfsemi þeirra.

a. Atvinnumálanefnd lýsir ánægju sinni með nýundirritaðann samning milli Heilbrigðisstofnunarinnar Ísafjarðarbæ og Íslenskrar erfðagreiningar og lýsir þeirri von að samningurinn leiði til fjölgunar starfa í Ísafjarðarbæ.

b. Rúnar Óli Karlsson, atvinnu- og ferðamálafulltrúi lagði fram kynningarrit um hafnir Ísafjarðarbæjar er gefinn hefur verið út af Land & Marin Publications Ltd. í Englandi. Kynningarritinu hefur verið og er verið að dreifa víða um heim og hér innanlands.

Fleira ekki gert fundarbókun upp lesin og samþykkt, fundi slitið kl. 18:15

Þorleifur Pálsson, ritari.

Kristján Haraldsson, formaður. Kristján G. Jóhannsson.

Henrý Bæringsson. Rúnar Óli Karlsson.