Í Vísindaporti föstudaginn 29. janúar mun Petra Granholm fjalla um sjálfsstjórn, afvopnun og herleysi Álandseyja. Vísindaportið hefst klukkan 12.10 að vanda og er opið öllum. Fyrirlesturinn fer fram á ensku.

Álandseyjar eru, ásamt Grænlandi og Færeyjum, eitt af þremur sjálfstjórnarsvæðunum sem eiga aðild að Norræna ráðinu. Sjálfstjórnarfyrirkomulagi þessara eyja í Eystrasaltinu hefur verið lýst sem einu því árangursríkasta í heiminum. Í erindi sínu á föstudaginn mun Petra Granholm kynna nokkrar hliðar á sjálfstjórn, afvopnun og herleysi eyjanna, ásamt sögu þeirra og samskiptum við Finnland, Svíþjóð og Rússland. Hún mun einnig koma inn á sænskuna sem töluð er í eyjunum og verndun minnihlutahópa.

Petra Granholm er meistaranemi í haf- og strandsvæðastjórnun við Háskólasetur Vestfjarða. Hún starfar einnig sem rannsóknarmaður hjá Friðarstofnun Álandseyja, sem sinnir verkefnum og rannsóknum á málefnum sem tengjast stríði og friði í víðum skilningi. Stofnunin beinir einkum sjónum að öryggi, sjálfsstjórn og minnihlutahópum ekki síst frá sjónarhóli Álandseyja og hinnar sérstöku stöðu eyjanna gagnvart alþjóðalögum.