Flřtilei­ir

Flateyrarh÷fn

Sími: 450 8084 - Fax: 456 7821 - Póstfang: flahofn@isafjordur.is

Vaktsími: 894-8823.

Hafnarvörður: Ágústa Guðmundsdóttir

Póstur: flahofn@isafjordur.is

 

Á Flateyri við norðanverðan Önundarfjörð hefur verslun verið stunduð frá því fyrir 1800. Norski umsvifamaðurinn Hans Ellefsen reisti þar hvalveiðistöð árið 1889 og var hún eitt stærsta fyrirtæki landsins. Stöðin brann rúmum áratug síðar og hóf Ellefsen þá smíði annarrar litlu innar við fjörðinn. Verkinu var hætt þegar búið var að hlaða reykháfinn og stendur hann enn rétt við þjóðveginn. Áður en Ellefsen fluttist brott gaf hann Hannesi Hafstein íbúðarhúsið sitt á Sólbakka ofan við Flateyri. Sumir segja að hann hafi selt honum húsið á eina krónu, aðrir segja fimm krónur. Hannes lét taka húsið sundur og flytja til Reykjavíkur. Þetta glæsilega hús er Ráðherrabústaðurinn við Tjarnargötu. Undirlendi fyrir botni Önundarfjarðar er víðlent á vestfirskan mælikvarða og þar er mikið fuglalíf. Gullin sandströndin undan Holti er falleg og hrein og tilvalinn vettvangur strandferða. Íbúar á Flateyri eru um 300.

 

Flateyrarhöfn hefur lengi verið lífhöfn sæfarenda. Af náttúrunnar hendi er við Flateyri gott skjól fyrir úthafsöldunni og er vitað til þess að erlendir duggarar hafi öldum saman sótt mikið í bugtina innan við eyrina. Á undanförnum árum hefur myndarlegum hafnarmannvirkjum verið komið upp á Flateyri og tekur nú góð hafskipabryggja við öllum stærðum skipa. Skjólgarðar gera það að verkum að bátum sem liggja við bryggju er óhætt, sama hvaðan vindur blæs.

 

Þrír löndunarkranar ætlaðir smábátum eru á Flateyrarhöfn. Að auki er þar öll sú aðstaða sem sjómönnum er nauðsynleg. Rafmagns- og vatnsaðgengi er gott, fiskmarkaður er á hafnarkantinum og fullkomin hafnarvog tryggir að löndun afla gengur hratt og örugglega fyrir sig. Vogarskúrinn á Flateyri hefur löngum verið notaður sem eins konar félagsmiðstöð sjómanna og er oft mikið um að vera í skúrnum eftir fengsælan dag. Atvinnurekendur á Flateyri hafa á undanförnum árum lagt mikið á sig til að bæta þjónustu við aðkomusjómenn.

Vefumsjˇn