Leikskólastjóri er Elsa María Thompson.

Laufás er opinn frá klukkan 7:45 - 16:15 alla virka daga.

Á Laufási er starfrækt ein deild, Krakkakot, með 3 aldursskipta hópa fyrir börn á aldrinum 1-6 ára.

http://www.leikskolinn.is/laufas/

Stefna - heilsuleikskóli

Leikskólinn Laufás er heilsuleikskóli og vinnur eftir heilsustefnu þar sem markmiðið er að auka gleði og vellíðan barnanna með áherslu á hreyfingu og holla næringu, gæði í samskiptum og listsköpun í leik og starfi. Í heilsustefnu Laufáss er markvisst unnið með hreyfingu. Skipulögð hreyfing fer m.a. fram í sundkennslu elstu barna, danskennslu fyrir 3-6 ára og ferðir í íþróttahúsið 1 sinni í viku. Þar fyrir utan eru hreyfistundir í hópastarfi og útivist í valstundum. Áhersluþættir hreyfingar tengjast m.a. þeim matsþáttum sem skoðaðir eru í heilsubók barnsins, Það er leikur að læra sem fylgir hverju barni í gegnum leikskóladvölina. Lögð er áhersla á fjölbreytt hreyfinám sem örvar og eflir hreyfifærni barnanna ásamt því að þau upplifi þá ánægju og vellíðan sem hreyfingin veitir þeim.

Uppeldisleg sýn og markmið á Laufási.

Einkunnarorð Laufáss eru Það er leikur að læra og með því er lögð áhersla á að barnsæskan sé ævintýri sem skemmtilegt er að taka þátt í. Lögð er áhersla á leikinn í allri sinni fjölbreyttu mynd og hann settur í öndvegi, því leikurinn felur í sér nám.

Á Laufási er markmiðið að börnin

• séu lífsglöð og þeim líði vel
• hafi trú á eigin getu
• beri virðingu fyrir sjálfum sér, öðrum og umhverfi sínu
• séu sjálfstæð, tillitssöm, skapandi og sjálfsörugg í lok leikskólagöngu sinnar

Markmið leikskólans er að búa börnum og starfsfólki öruggt og þroskandi umhverfi sem býður upp á fjölbreytni í leik og starfi með hlýju, virðingu og samkennd að leiðarljósi. Einnig að auka gleði og vellíðan barnanna með áherslu á næringu, hreyfingu og málörvun í leik og starfi.