Fræðslumiðstöð Vestfjarða hefur ákveðið að efna til námskeið í vetur þar sem hægt verður að meta námið til iðnmeistaraprófs eða meistaraskóla. Námskeiðin koma til með að samsvara áföngum sem allir meistaranemar eru skyldugir til að taka að frátaldri tölvunotkun. Samstarf milli Fræðslumiðstöðvarinnar og meistaraskóla Tækniskólans, gerir gerir þetta kleift. Kennslan kemur í framhaldi af námsskránni „Nám og þjálfun“ í almennum bóklegum greinum sem kennd var veturinn 2009 til 2010 í samvinnu við Menntaskólann á Ísafirði.

Íshellir fannst í Hattardal í Álftafirði um síðustu helgi. Það var Magnús Einarsson sem fann hellinn og fór hann daginn eftir ásamt Cristian Gallo og David Fossati til að mynda hellirinn og hafa þær verið birtar á vef Náttúrustofu Vestfjarða. Hellirinn var mældur með fjarlægðarmæli og reyndist hann vera 170 m langur. Hæðin á munnanum er u.þ.b. 10 metrar en hún var ekki mæld nákvæmlega. Lofthæðin í miðju hellirin er væntanlega um fimm metrar og breidd munnans mældist 12 metrar. Hellirinn er opinn í báða enda og er gólfið í honum þakið grjóti, sumt frekar laust.

Mikill áhugi virðist vera fyrir fyrsta leiklistarskóla Vestfjarða en skráning hefur gengið framar vonum, þrátt fyrir að vera ekki hafin formlega. Skólinn tekur til starfa á Ísafirði síðar í mánuðinum. „Það kom okkur skemmtilega á óvart hve skráning hefur farið vel af stað, frá því að bæklingur frá okkur kom í öll hús á norðanverðum Vestfjörðum hafa borist umsóknir alla daga. Það er búið að skrá í alla hópa en þó ekki fullsetið svo við getum vel tekið við fleirum,“ segir Elfar Logi Hannesson annar stofnenda og kennari skólans. Opið hús verður í skólanum á morgun þar sem fólki gefst kostur á að kynna sér starfsemi og húsnæði hans. Í kjölfarið hefst formleg skráning.

Biðlisti á leikskóla Ísafjarðarbæjar er ekki lengur virkur þar sem öll börn á listaum eru yngri en 18 mánaðar. Samkvæmt upplýsingum frá Ísafjarðarbæ eru 18 börn á listanum. „Eins og staðan er núna komum við öllum börnum af biðlistanum inn á leikskóla þetta haustið, sem eru 18. mánaða og eldri og gott betur en það og er það auðvitað mjög ánægjulegt,“ segir Sigurlína Jónasdóttir leikskólafulltrúi Ísafjarðarbæjar. Í Ísafjarðarbæ eru sex leikskólar, Sólborg og Eyrarskjól eru á Ísafirði, Bakkaskjól í Hnífsdal, Tjarnarbær á Suðureyri, Laufás á Þingeyri og Grænigarður á Flateyri.

Hafnarkanturinn á Flateyri hefur sigið mikið í gegnum árin og er nú svo komið að oftar en ekki flæðir yfir kantinn. Óvenju há sjávarstaða er nú í kringum landið og hefur því flætt yfir hafnarkantinn á Flateyri. Að sögn Jóhanns Birkis Helgasonar bæjartæknifræðing hjá Ísafjarðarbæ hefur þetta verið vandamál til nokkurra ára. „Við höfum verið að fylgjast með kantinum til að sjá hvort hann sé hættur að síga. Þetta er í skoðun hjá Siglingastofnun.“ Jóhann bætir við að þar sem lítil útgerð sé á Flateyri, hefur sigið ekki valdið miklum vandræðum en vitaskuld sé þetta óheppilegt.