Nemendur Grunnskólans á Ísafirði fóru í sínar árlegu fjallgöngur í síðustu viku. Göngurnar eru fyrir löngu orðnar fastur liður í skólastarfinu á haustin. Fyrsti bekkur fer upp í Stórurð og síðan taka við brattari brekkur og lengri eftir því sem árin líða, þannig að þegar skólagöngunni lýkur hafa börnin klifið öll helstu fjöll í nágrenni sínu. 10. bekkur gerði sér lítið fyrir og gekk frá Hesteyri yfir í Aðalvík í blíðskaparveðri.

BÍ/Bolungarvík vann lið Víðis frá Garði 4-2 á Skeiðisvelli í Bolungarvík á laugardag. Jónmundur Grétarsson skoraði tvö mörk og bræðurnir Andri og Óttar Bjarnasynir sitt markið hvor. Með sigrinum tryggði liðið sér endanlega annað sæti deildarinnar og þar með þátttökurétt í 1. deild að ári. Að því er fram kemur á vef liðsins mætti fjöldi manns á leikinn og þegar dómarinn hafði flautað til leiksloka brutust út mikil fagnaðarlæti meðal leikmanna og stuðningsmanna liðsins og voru blys tendruð í lok leiksins upp í brekku. „Þar með er ljóst að við erum að fara fá gömul stórveldi í heimsókn hingað vestur næsta sumar og strákarnir spila á ekki ómerkari völlum heldur en Valbjarnarvelli og Akranesvelli,“ segir á bibol.is.

Árgangur 1936 frá Ísafirði hittist á ný um helgina. „Við byrjuðum á því að hittast í Tjöruhúsinu á föstudagskvöld og borðuðum þar saman. Síðan röltum við í Edinborgarhúsið og spjölluðum þar saman langt fram á kvöld. Á laugardag hittumst við aftur og var þá Safnahúsið skoðað hátt og lágt. Veðrið var svo gott að fólk vildi ekki fara í neinar bílaferðir þannig að menn tvístruðust um bæinn og fóru að skoða gömul heimkynni og þær breytingar sem hafa orðið á bænum. Við hittumst síðan í kaffi í Faktorshúsinu í Hæstakaupstað áður en við héldum á Hótel Ísafjörð þar sem við borðuðum saman kvöldverð og sátum fram á miðnætti,“ segir Sigurður Ólafsson sem var einn úr hópnum.

Árgangur 1956 frá Ísafirði hélt helgina hátíðlega og fagnaði því að 40 ár eru liðin frá fermingu þeirra. Ákveðið var að hafa nálgunina eða þemað „að gæla við minningarnar“ eins og Sigurþór Hallbjörnsson, eða Spessi ljósmyndari, orðaði það. Hugmyndin var að hópurinn myndi fara 40 ár aftur í tímann. „Upp kom hugmynd að rölta um bæinn og fá leiðsögumann en þá yrðum við eins og túristar,“ sagði Spessi. Árgangurinn ákvað því að hittast í Tjöruhúsinu á föstudeginum til þess að koma sér saman og rifja upp gamlar minningar. Síðan hittust þau aftur daginn eftir við gamla sjúkrahúsið, gengu um bæinn að öllum húsum sem þátttakendur höfðu búið í og skoðuðu nágrennið og leiksvæði allra sem voru í hópnum. „Síðan var farið í Gamla bakaríið og fengið sér kókoslengju, Napóleonsköku og kringlu,“ sagði Spessi. Hópurinn kom síðan við í gamla barna- og gagnfræðaskólann til þess að sjá hvað hafi breyst í gegnum tíðina.

Albertína Friðbjörg Elíasdóttir, bæjarfulltrúi í Ísafjarðarbæ, var kjörin formaður stjórnar Fjórðungssambands Vestfirðinga á 55. fjórðungsþingi Vestfirðinga sem haldið var á Hólmavík um helgina. „Ég hlakka mikið til að vinna með sveitarstjórnarmönnum á Vestfjörðum. Það eru mörg tækifæri framundan og þetta er ótrúlega spennandi vettvangur sem tvímælalaust má efla þótt Fjórðungssambandið hafi staðið fyrir góðu starfi undanfarin ár,“ segir hinn nýi formaður. „Þetta er spennandi starf og ég mun leggja mig alla fram að starfa vel að hagsmunum Vestfirðinga,“ bætir Albertína við. Aðrir í stjórn eru Friðbjörg Matthíasdóttir í Vesturbyggð, Jón Jónsson í Strandabyggð, Ómar Már Jónsson í Súðavíkurhreppi og Sigurður Pétursson í Ísafjarðarbæ. Fráfarandi formaður sambandsins er Anna Guðrún Edvardsdóttir bæjarfulltrúi í Bolungarvík en hún hefur óskað eftir ársleyfi frá þeim störfum vegna náms.